ماددا ئێکێ: ئارمانجێن یاسایێ
ئارمانج ژ ڤێ یاسایێ:
دابینکرنا یەکەیێن ئاکنجیبوونێ یێن گونجای بۆ گەنجێن تازە هەڤژینیێ پێکدئینن بۆ گەهشتن ب ئارامیا خێزانی و جڤاکی.
هاندانا گەنجان ل سەر پێکئینانا هەڤژینیێ ب رێیا کێمکرنا بارگرانیێن دارایی یێن گرێدای ب ئاکنجیبوونێ ڤە.
پشتەڤانیکرنا نفشێن گەنج بۆ دەستپێکرنا ژیانەکا خێزانی یا سەقامگیر.
پشکداریکرن د کێمکرنا دژوارییا قەیرانا ئانجیبوونێ دا ل هەرێما کوردستانێ و گەهشتن ب وەرار و گەشەپێدانا جڤاکییا بەردەوام.
ماددا دووێ: پێناسەبۆ ئارمانجێن ڤێ یاسایێ:
گەنجێن تازە هەڤژینیێ پێکدئینن: ئەو هەڤژینێن زێدەتر ژ ٥ ساڵان ب سەر هەڤژینیا وان دا دەرباز نەبووین.
یەکەیێن ئاکنجیبوون : خانی یان شوقێن ئاکنجیبوونێ ئەوێن دهێنە تەرخانکرن بۆ گەنجێن تازە هەڤژینی پێکئینای د کەڤانێ پرۆگرامێ ئاکنجیبوونێ یێ حکومی دا.
قەرێن ئاکنجیبوونێ یێن پشتەڤانی لێ کری:
ئەو قەرێن کێم مفا ل سەر یێن کو حکومەت پێشکێش دکەت بۆ پشتەڤانیا کڕین یان ئاڤاکرنا یەکەیێن ئاکنجیبوونێ.
ماددا سیێ: تەرخانکرنا پارچێن ئەردی و ئاڤاکرنا یەکەیێن ئاکنجیبوونێ
حکومەت دێ رابیت ب تەرخانکرنا پارچێن ئەردی بۆ ئاڤاکرنا یەکەیێن کۆمەڵگەهێن ئاکنجیبوونێ بۆ گەنجێن تازە هەڤژینیێ پێکدئینن ل دەڤەرێن جودا جودا ل هەرێما کوردستانێ کو ل گەل پێداویستیێن گەشەیا ئاکنجییان و دابەشبوونا جوگرافی .
یەکەیێن ئاکنجیبوونێ دابەش دبن ل گوڕ پیڤەرێن رووبەری داکو ل گەل پێدڤیێن خێزانا نوی بگونجن، ل گەل لبەرچاڤ وەرگرتنا بەرفرەهبوونا خێزانێ ل پاشەرۆژێ.
ل دەستپێکێ دێ بۆ تەخا هەژار و دەست کورت بیت، ل گەل پشتڕاستکرنا کو هەردوو هەڤژینان چ مولکێن ئاکنجیبوونێ نەبووینە بەری نها .
ماددا چوارێ :پشتەڤانیا دارایی و لێبورینێن باجان
حکومەت دێ قەرێن ئاکجیکرنێ دابین کەت ب مفایەکێ کێم یان بێی مفا، کو ب درێژاهیا ٢٠ هەتا ٢٥ ساڵان بهێنە ئەداکرن.
لێبورینا باجێ ل سەر یەکەیێن ئاکنجیبوونێ بۆ گەنجێن تازە هەڤژینی پێکئینای دێ هێتە بەخشین بۆ دەمێ ١٠ ساڵان، کو لێبورینا باجا مولکان و باجێن گرێدای ب خزمەتگوزاریان ڤە ڤەدگریت.
ل دەمێ ژدایکبوونا ئێکەم ژدایکبوویێ خێزانێ ل دەمێ پێنج ساڵێن دەستپێکیێن هەڤژینیێ، هەردوو هەڤژین دێ هێنە بەخشین ژ دانا قستێن هەیڤانەیێن وی قەری بۆ دەمێ ساڵەکێ کو ژ مێژوویا ژ دایکبوونا زارۆکی دەستپێدکەت .
ماددا پێنجێ: مەرجێن شایستەبوونێ بۆ مفاوەرگرتنێ ژ پرۆگرامی، مەرجە:
ئێک ژ هەردوو هەڤژینان ب لایێ کێم وەڵاتیەکێ تۆمارکری بیت ل ل هەرێما کوردستانێ.
دڤێت پرۆسا هەڤژینیێ یا نوی بیت و زێدەتر ژ پێنج ساڵان ب سەر دا دەرباز نەببن.
چ ژ هەردوو هەڤژینان چ یەکەیێن ئاکنجیبوونێ یێن دی نەبن بەری هەڤژینیێ یان ل دەمێ پێشکێشکرنێ.
خێزان دێ سۆزنامەکێ ئیمزا کەت کو وێ یەکەیا ئاکنجیبوونێ وەک خۆجهییا سەرەکی بکاربینیت و نە فرۆشیت و نە دەتە ب کرێ بۆ دەمێ ١٥ ساڵان.
ماددا شەشێ: میکانیزما بجهئینانێ
حکومەت دێ دەستەیەکا تایبەت پێکئینیت کو ب سەر وەزارەتا ئاڤەدانکرن و ئاکنجیکرنێ ڤە بیت بۆ سەرپەرشتیکرنێ ل سەر بجهئینانا یاسایێ و برێڤەبرنا وێ ب ئاوایەکێ کارا.
هەڤکاری دێ ل گەل بەنکێن ناڤخۆیی هێتە کرن بۆ کارئاسنیێ د پێدانا قەرێن ئاکنجیکرنێ یێن پشتەڤانی لێ کری بۆ گەنجێن تازە هەڤژینیێ پێکدئینن.
هاندنا کەرتێ تایبەت و رێکخراوێن نە حکومی بهێتە کرن ل سەر پشکداریێ د پارەداکرنا ب رێیا هەڤپشکیێن جڤاکی.
ماددا حەفتێ: بڕگێن ڤەگوهۆڕینێ
حکومەت دێ هویرکاری و میکانێزمێن پێشکێشکرنێ و مەرجێن تێر و تەسەل دەستنیشان کەت ب رێیا رێسایێن بجهئینانێ کو پاشی دێ دەرکەت. کار دێ ب ڤێ یاسایێ هێتە کرن ژ رۆژا بەڵاڤبوونا وێ ل رۆژناما فەرمی.
