التجاوز إلى المحتوى
پرۆژە یاسایا پشتەڤانیکرنا گەنجان ل هەرێما کوردستانێ بۆ پشکدارییێ د خول و بەرنامێن نێڤدەولەتی دا
ب ناڤێ خۆدایێ مەزن و دلوڤان.
ل سەر بنیاتێ پرەنسیپێن دادپەروەری و یەکسانییێ و خەمخۆریا شیاندنا گەنجان کو ستوینا سەرەکی نە د ئاڤاکرنا پاشەرۆژا گەش دا بۆ هەرێما کوردستانێ، و هەستکرن ب رۆلێ گەنجان د چەسپاندنا وەرارا بەردەوام و تێکەلیێ د گەل جیهانا ژدەرڤە بۆ بدەستڤەئینانا وان زانین و پسپۆرییێن کو رول هەی د گەشەپێدانا جڤاکی دا،
و وەک بەرسڤدانەک بۆ وان قەبخوازییێن هەڤبەری گەنجان دبن د بدەستڤەئینانا ئۆمێدێن وان یێن ئەکادیمی و پیشەیی دا و حەزا وان بۆ چەسپاندنا دەلیڤێن فێربوون و راهێنانان ل دەرڤەی وەڵاتی کو رول هەیە د بلندکرنا ئاستێ شیانێن گەنجان و بەرفرەهکرنا ئاسۆیێن وان، و ژبەرکو ئەرکە ل سەر حکومەتا هەرێما کوردستانێ پشتەڤانی و هاندانا گەنجان بکەت بۆ پشکداریێ د خول و بەرنامێن نێڤدەولەتی دا، ڤێ یاسایێ دەردکەین.
ماددا ئێکێ: پێناسە.
مەبەست ژ زاراڤێن ل خوارێ د هەر جهەکێ ڤێ یاسایێ دا بهێت، ڤان رامانێن خوارێ دگەهینیت:
گەنج: ئەو کەسێن ژییێ وان د ناڤبەرا ١٨ـ٣٥ دا ژ وەڵاتیێن هەرێما کوردستانێ.
خول و بەرنامێن نێڤدەولەتی:
پێکدهێت ژ خولێن فێرکاری، راهێنانی، رۆشەنبیری، وەرزشی، و کۆنگرێن ل دەرڤەی وەڵاتی دهێنە گرێدان ب ئارمانجا گەشەپێدانا پسپۆریان و زانینێ.
لایەنێن پەیوەندیدار:
وەزارەت و دەستەیێن حکومی ل هەرێما کوردستانێ یێن پەیوەندیدار ب بجهئینانا ڤێ یاسایێ.
ماددا دووێ: ئارمانجێن یاسایێ.
ئارمانجا ڤێ یاسایێ بۆ:
١ـ پشتەڤانیکرنا گەنجان ل هەرێما کوردستانێ بۆ پشکداریێ د خول و بەرنامێن نێڤدەولەتی دا بۆ بلندکرنا ئاستێ پسپۆریێن وان و گەشەپێدانا شیانێن وان.
٢ـ پێشخستنا ب هەڤ گوهۆڕینا کەلتوری و زانینێ د ناڤبەرا گەنجێن هەرێمێ و گەنجێن وەڵاتێن دی دا.
٣ـ بهێزکرنا گەنجان بۆ بدەستڤەئینانا ئۆمێدێن وان یێن پیشەیی و ئەکادیمی ب ڕێیا دەلیڤێن راهێنان و فێربوونا نێڤدەولەتی.
ماددا سیێ: پشتەڤانییا دارایی
-
حکومەتا هەرێما کوردستانێ بودجەکا ساڵانە تەرخان بکەت بۆ پشتەڤانییا وان گەنجێن حەزا پشکداری د خول و بەرنامێن نێڤدەولەتی دا هەی.
-
پشتەڤانییا دارایی دێ هێتە دابینکرن بۆ گەنجان ل سەر بنیاتێ پیڤەرێن تایبەت، ژ وان ژی مفایێن فێرکاری یان راهێنانی یێن خولێ یان بەرنامان، و کا دێ چەند کاریگەری هەبیت ل سەر گەشەپێدانا پسپۆرییێن پشکداران.
-
پشتەڤانیا دارایی خەرجیێن گەشتێ، ئاکنجیبوونێ، باجێن گرێدای ب پشکدارییا بەرنامە و خولان ڤەدگریت.
ماددا چوارێ: میکانیزما پێشکێشکرنێ
١ـ ئەو گەنجێن حەزا بدەستڤەئینانا پشتەڤانییێ هەی، فەرە داخوازییێن خۆ ب نڤێسین پێشکێشی لایەنێن پەیوەندیدار بکەن هەڤپێج بیت ل گەل بەڵگەنامان کو رزامەندییێ بسەلمینیت د خولێ یان بەرنامێ نێڤدەولەتی دا.
٢ـ لایەنێن پەیوەندیدار دێ دویڤچوونا ل گوڕ پیڤەرێن تایبەت کەت و دێ بڕیارا خۆ دەرکەت د دەمێ زێدەتر نەبیت ژ ٣٠ رۆژان ژ رۆژا پێشکێشکرنا داخوازییێ.
ماددا پێنجێ: پابەندبوون و راپۆرت
١ـ دڤێت ئەو گەنجێن داخوازکری ل گوڕ ڤێ یاسایێ راپۆرتەکا تێر و تەسەل پێشکێشی لایەنێ بەخشەر بکەت پشتی ب دوماهی هاتنا خولێ یان بەرنامەی، تێدا مفایێن ب دەستڤەهاتی رۆهن بکەت و چەوانییا بجهئینانا وان ل هەرێما کوردستانێ.
٢ـ چێدبیت لایەنێ پەیوەندیدار داخواز ز داخوازکریان بکەت وورک شۆپ یان سمیناران پێشکێش بکەن بۆ ب هەڤگوهۆڕینا پسپۆرییان و ئەو زانینێن وەرگرتین ل گەل گەنجێن دی یێن هەرێما کوردستانێ.
ماددا شەشێ: سزا
١ـ ل دەمێ پێشکێشکرنا زانیارییێن شاش یان سەختە د داخوازییان دا، کەسێ مفادار دێ پێگیر بیت ب ڤەگەڕاندنا هەمی خەرجیێن دارایی یێت وەرگرتین، زێدەباری سزادانا دارایی کو لایەنێ پەیوەندیدار دێ دیار کەت.
٢ـ بۆ لایەنێ پەیوەندیدار هەیە پێڕابوونێن یاساییێن زێدەتر بگریتە بەر ل گوڕ یاسایێن کارپێکری ل هەرێما کوردستانێ.
ماددا حەفتێ: بجهئینانا یاسایێ
١ـ بەرپرسیارەتییا بجهئینانا ڤێ یاسایێ دێ ب وەزارەتا وەرزش و لاوان هێتە سپاردن ب هەڤکاری دگەل وەزارەتا دارایی ل هەرێما کوردستانێ.
٢- جڤاتا وەزیران ل هەرێما کوردستانێ دێ ڕێسایا بجهئینانێ بۆ ڤێ یاسایێ دەرکەت د دەمێ ٩٠ رۆژان ژ رۆژا بەڵاڤکرنا وێ.
ماددا هەشتێ: بجهئینان
کار دێ ب ڤێ یاسایێ هێتە کرن ژ رۆژا بەڵاڤبوونا وێ د رۆژناما فەرمییا هەرێما کوردستانێ دا.
