رەشنڤیسێ پڕۆژە یاسایا پشتەڤانیکرنا داهێنەران ل هەرێما کوردستانێ

ماددا ئێکێ: ئارمانج

ئارمانج ژ ڤێ یاسایێ دروستکرنا چوارچۆڤەکێ گشتگیرە بۆ پشتەڤانیکرنا داهێنەران ل هەرێما کوردستانا عیراقێ، د بیاڤێن ئەدەب، هۆنەر، مۆزیک، شانۆ، سینەما، راگەهاندن، زانست و تەکنۆلۆجیایێ دا. ئەڤ یاسایە بزاڤێ دکەت بۆ چەسپاندنا ژینگەهەکا داهێنەرانە و رۆشەنبیری و تەکنیکی ب ڕێیا دابینکرنا پشتەڤانیا دارایی، هۆنەری و تەکنیکی.

ماددا دووێ: پێناسە

– داهێنەر: ئەو کەس یان ئەو گرۆپێن داهێنانێ دبیاڤێن ئەدەب، هۆنەرێن جوان، مۆزیک، شانۆ، سینەما، راگەهاندن، زانست، تەکنۆلۆجیا، یان هەر بیاڤەکێ دی دا یێ خودان سرۆشتەکێ داهێنەرانە یان تەکنیانە. -پشتەڤانی: تەڤ جۆرێن هاریکاریێن مادی و مۆڕاڵی بخۆڤە دگریت ئەوێن ب داهێنەران دهێنە بەخشین بۆ بجهئینانا پرۆژێن خۆ. -سندوق: سندوقا پشتەڤانیکرنا داهێنەر و تەکنیککاران ئەو کو دهێتە دروستکرن ل گوڕ ڤێ یاسایێ.

ماددا سیێ: دروستکرنا سندوقا پشتەڤانیکرنا داهێنەر و تەکنیککاران ١. ل گوڕ ڤێ یاسایێ سندوقەک دێ هێتە دروستکرن بناڤێ «سندوقا پشتەڤانیکرنا داهێنەر و تەکنیککاران ل هەرێما کوردستانێ»، ئارمانج ژێ پێشکێشکرنا هاریکاریێن دارایی هۆنەری و تەکنیکر بۆ داهێنەران د تەڤ بیاڤان دا. ٢. ژێدەرێن دارایی بۆ وێ سندۆقێ دێ هێنە تەرخانکرن ژ: -بودجا حکومەتا هەرێما کوردستانێ. -بەخشین و هاریکاریێن ناڤخۆیی و نێڤدەوڵەتی. – داهاتێ چاڵاکی و پرۆژێن رۆشەنبیری و هۆنەری و تەکنیکی. ـ رێژا ٣% ژ مفایێ لایەنێن سوودمەند ژ ڤێ یاسایێ.

ماددا چوارێ: بڕێڤەبرنا سندوقێ

١- جڤاتا ئیدارێدێ سندوقێ بڕێڤەبەت کو پێکهاتیە ژ : – نوێنەرەک ژ وەزارەتا رۆشەنبیری و لاوان (سەرۆک). – نوێنەرەک ژ وەزارەتا دارایی. نوێنەرەک ژ وەزارەتا خواندنا بلند و ڤەکۆلینێن زانستی. – سێ ئەندام دێ هێنە دامەزراندن کو خودان بسپۆری و سەربۆڕ بن د بیاڤێن داهێنەرانە و تەکنیککارانە دا . ٢- ئەندامێن جڤاتا ئیدارێ بۆ دەمێ سێ ساڵان دێ هێنە دانان کو د شیان دایە بۆ نوی کرنێ.

ماددا پێنجێ: جۆرێن وان پشتەڤانیێن دهێنە پێشکێشکرن

١- پشتەڤانیا دارایی: پێکدهێت ژ پێشکێشکرنا هاریکاریان و قەرێن سڤک ب داهێنەر و تەکنیکاران.

٢- پشتەڤانیا تەکنیکی: دابینکرنا راهێنان و وەبەرهێنانێن تەکنینیکی بۆ پێشئێخستنا شیانێن داهێنەر و تەکنیکاران.

٣- پشتەڤانیا تەکنۆلۆجی: پێکدهێت ژ دابینکرنا ژێدەرێن تەکنۆلۆجی مینا پرۆگرامان، ئامیران، وورک شۆپێن تەکنۆلۆجی بۆ پشتەڤانیا پرۆژێن داهێنانێ و تەکنۆلۆجیایێ.

٤- پشتەڤانیا بازاڕکرنێ: هاریکاریکرنا داهێنەر و تەکنیکاران د بەربازڕاکرنا کار و بەرهەمێن وان د ل سەر هەردوو ئاستێن ناڤخۆیی و نێڤدەوڵەتی.

٥-پشتەڤانیا لۆجستی: دابینکرنا ئاڵاڤ و کەل و پەلان و ژێرخانا پێدڤی بۆ بجهئینانا پرۆژێن داهێنان و تەکنۆلۆجیایێ.

ماددا ششێ: مەرجێن مفاوەرگرتنێ ژ پشتەڤانیێ

١- جڤاتا بڕێڤەبرنا سندوقێ دێ وان مەرج و پیڤەران دەستنیشان کەت، کو پێدڤی یە ل جەم داهێنەر و تەکنیککاران هەبن بۆ بدەسڤەئینانا پشتەڤانیێ.

 ٢- دێ داخوازیەک ئاڕاستەی جڤاتا بڕێڤەبرنا سندوقێ هێتە کرن بۆ لبەرچاڤکرنێ .

ماددا حەفتێ: پاراستنا مافێن داهێنەران و تەکنیککاران حکومەتا هەرێما کوردستانێ دێ پابەند بیت ب گەرەنتیکرنا مافێن خاوەنداریا هزری و دهێنانێ یا داهێنەران و تەکنیککاران ، و گەرەنتیا کەیس لێ ئستیغلال نەکرنا کارێن وان یان داهێنانێن وان ب هەر جۆرەکی ژ جۆران بێی رازەمەندیا وان ب زەڵاڵی.

ماددا هەشتێ: پێگیریێن ل سەر سۆدمەندان پێدڤی

١. دڤێت سودمەندێن ژ پشتەڤانیێ راپۆرتێن وەرزی پێشکێش بکەن ل سەر پێشڤەچوونا بدەستڤەهاتی د پرۆژێن وان دا و چەوانیا بکارئینانا پشتەڤانیێ.

٢. ل دەمێ پێگیری نەکرن ب مەرجێن پشتەڤانیێ یان خراب بکارئینانا هاریکایێن هاتینە پێشکێشکرن، سندوقێ ماف هەیە وان پاران ژێ وەرگریت یان هەڵوەشاندنا پشتەڤانیێ.

ماددا نەهێ: زەڵاڵکرن و لێپرسین

١. فەرە ل سەر جڤاتا بڕێڤەبرنا سندوقێ راپۆرتێن ساڵانە ل سەر کارێن خۆ و دەرئەنجامێن پشتەڤانیا خۆ بۆ داهێنەران و تەکنیککاران ئامادە بکەت، و بۆ پەرلەمانی و جەماوەری بەرچاڤ بکەت.

 ٢. دروستکرنا میکانیزمەکێ بۆ لێپرسینێ کو زەڵاڵکرن و شەفافیەتێ د بەڵاڤکرن و بکارئینانا داهاتێن سندۆقێ مسۆگەر بکەت.

ماددا دەهێ: حوکمێن گشتی

١. کار ب ڤێ یاسایێ دێ هێتە کرن پشتی ٩٠ رۆژان ژ مێژوویا بەڵاڤکرنا وێ د رۆژناما وقائع کوردستان دا.

 ٢. حکومەت دێ رێسایێن بجهئینانێ یێن پێدڤی دەرکەت بۆ بجهئینانا حوکمێن ڤێ یاسایێ د دەمێ سێ مەهان دا ز مێژوویا کاریگەریا وێ.